कार्य विभाग
परिचय:
नेपाल प्रहरी नेपालमा कानून कार्यान्वयन गर्ने प्रमुख, संवेदनशील र उत्तरदायी सुरक्षा निकाय हुनुका साथै नागरिक सुरक्षाको प्रत्याभूति, सामाजिक शान्ति, सुशासन र सार्वजनिक विश्वासको संस्थागत विकासमा सक्रिय भूमिका निर्वाह गर्दै आएको संगठन हो । यसले अपराध नियन्त्रण तथा अनुसन्धानका साथै सामाजिक न्याय, नैतिक अनुशासन र संवैधानिक मूल्यहरूको संरक्षणमा महत्वपुर्ण योगदान पुर्याउँदै आएको छ । नागरिक प्रतिको सम्मान, निष्पक्षता र उत्तरदायित्वपूर्ण व्यवहार प्रहरीप्रतिको विश्वासको मूल आधार हो । यिनै सिद्धान्तहरूलाई आत्मसात गर्दै नेपाल प्रहरी प्रधान कार्यालयले संगठनको प्रभावकारी परिचालन, समन्वय र व्यवस्थापन सुनिश्चित गर्न नेपाल प्रहरी प्रधान कार्यालय मातहत रहने गरि प्रहरी नायव महानिरीक्षकको नेतृत्वमा बि.स.२०५४ जेठ २६ गते कार्य विभागको स्थापना गरिएको थियो । विभागको बढ्दो कार्य व्यस्तता र जिम्मेवारीलाई नेतृत्व प्रदान गर्न बि.सं. २०४९ फाल्गुन १५ गतेवाट प्रहरी अतिरिक्त महानिरीक्षकलाई विभागीय प्रमुखको जिम्मेवारी सुम्पिएको थियो ।
प्रविधिमा आधारित अपराध, अन्तर्राष्ट्रिय तथा सीमावर्ती अपराधसँगै आन्तरिक सुरक्षा चुनौतीहरूले नेपालको शान्ति सुव्यवस्थामा जटिल चुनौतीहरू सिर्जना गरिरहेको वर्तमान परिप्रेक्ष्यमा, सुरक्षाको प्रभावकारी व्यवस्थापनका लागि नेपाल प्रहरीको कार्य विभागले देशव्यापी शान्ति सुरक्षा, दैवी प्रकोप उद्धार, भीड तथा दंगा नियन्त्रण, विशिष्ट व्यक्तिको सुरक्षा, ट्राफिक व्यवस्थापन, आतंकवादी गतिविधि निगरानी लगायत बहुआयामिक जिम्मेवारीहरू निरन्तर अहोरात्र समर्पित भई समन्वय, सञ्चालन, निगरानी तथा निर्देशन प्रदान गर्दै आएको छ । कार्य विभागले समग्र प्रहरी परिचालनलाई प्रभावकारी रूपमा संयोजन गरी देशभरिका सुरक्षा गतिविधिहरूलाई एकीकृत दिशामा उन्मुख गराउँदै राष्ट्रिय सुरक्षाको प्रत्याभूति सुनिश्चित गर्ने महत्वपूर्ण भूमिका निर्वाह गर्नुका साथै वर्तमानमा देखिएका जटिल चुनौतीहरूलाई सशक्त रूपमा सम्बोधन गर्दै कानूनी शासन, सामाजिक शान्ति र राष्ट्रिय सुरक्षामा नेपाल प्रहरीको दृढ प्रतिबद्धता दिगो रूपमा कायम राख्न प्रतिवद्द रहेको छ ।
उद्देश्य:
- विभागको व्यवस्थापन तथा सञ्चालन, नेपाल प्रहरी स्मारक गुठीको प्रशासनिक तथा व्यवस्थापकीय पक्ष, शान्ति सुरक्षा, दैवी प्रकोप, कारागार, विमानस्थलको सुरक्षा व्यवस्था अनुगमन, निरीक्षण लगायतका विषयहरु, शान्ति सुरक्षाको निमित्त थप जनशक्ति परिचालन, प्रहरी कार्यकुशलता, कार्य सम्पादन सम्बन्धी नीति, नियम, रणनीति, योजना एवं कार्ययोजना तर्जुमा तथा कार्यान्वयन गर्ने गराउने ।
- नेपाल प्रहरी र विभागको सङ्गठनात्मक व्यवस्थापन (आन्तरिक व्यवस्थापन, अभिलेख व्यवस्थापन) तथा मानव संसाधनको व्यवस्थापन गर्ने ।
- संगठनको सेवा प्रवाह, प्रहरी परिचालन कक्ष सञ्चालन सम्बन्धमा विभाग, महाशाखा, शाखा र कार्यालयहरुको सुपरिवेक्षण, अनुगमन, नियमन तथा निर्देशन गर्ने ।
- नेपाल प्रहरी प्रधान कार्यालय, मातहतका कार्यालयहरु र प्रदेश आन्तरिक मामिला तथा कानून मन्त्रालय एवं प्रदेश प्रहरीबीच नेपाल प्रहरी स्मारक गुठीको प्रशासनिक तथा व्यवस्थापकीय पक्ष, शान्ति सुरक्षा, दैवी प्रकोप, कारागार, विमानस्थलको सुरक्षा व्यवस्था अनुगमन, निरीक्षण लगायतका विषयहरु, शान्ति सुरक्षाको निमित्त थप जनशक्ति परिचालन, प्रहरी कार्यकुशलता, कार्य सम्पादन सम्बन्धी विषयमा आवश्यक समन्वय र सहकार्य गर्ने ।
- निर्देशनालयको व्यवस्थापन तथा सेवा प्रवाह सम्बन्धी नेपाल प्रहरी प्रधान कार्यालय र तालुक पदाधिकारी समक्ष आवधिक प्रतिवेदन पेश गर्ने ।
- संगठन सञ्चालन तथा विकास व्यवस्थापन सम्बन्धी बजेट तर्जुमा तथा सोको प्रभावकारी कार्यान्वयन गर्ने, गराउने ।
- प्रदेशबाट माग/ अनुरोध भई आएको खण्डमा नेपाल प्रहरी स्मारक गुठीको प्रशासनिक तथा व्यवस्थापकीय पक्ष, शान्ति सुरक्षा, दैवी प्रकोप, कारागार, विमानस्थलको सुरक्षा व्यवस्था अनुगमन, निरीक्षण लगायतका विषयहरु, शान्ति सुरक्षाको निमित्त थप जनशक्ति परिचालन, प्रहरी कार्यकुशलता, कार्य सम्पादन सम्बन्धी प्रशिक्षण, व्यवस्थापन तथा क्षमता विकास गर्ने ।
- कानुन बमोजिम तोकिएका अन्य कार्य गर्ने ।