नेपाल प्रहरी प्रधान कार्यालय
कार्य विभाग
आतंकवाद नियन्त्रण शाखा
परिचय:
नेपालमा वि.सं. २०५२ सालबाट सुरुवात भएको भूमिगत सशस्त्र संघर्ष मुलतः प्रहरी, अन्य राष्ट्र सेवक कर्मचारी, प्रहरी इकाई र सरकारी कार्यालय लगायत अन्य भौतिक संरचना समेतमा आक्रमण गर्दै आफ्ना संघर्षका अभियानमा विमती राख्ने सर्वसाधारण व्यक्तिहरु माथि समेत भौतिक रुपमै आक्रमण सुरु भए पछि उक्त गतिविधिलाई नियन्त्रण गर्न तत्कालै प्रहरी परिचालनलाई प्रभावकारी बनाई उक्त गतिविधि सम्बन्धि वास्तविक सूचना संकलन र विश्लेषण गरी आवश्यक कारवाहीको लागि रणनीति एवं योजना बनाउने उद्देश्यले मिति २०५२।११।१२ गते प्रहरी प्रधान कार्यालय, कार्य विभाग अन्तर्गत रहने गरी आतंकवाद नियन्त्रण महाशाखाको रुपमा स्थापना गरिएको थियो । तत्पश्चात मिति २०६३ साल मंसिर ५ गते शान्ति सम्झौता पश्चात पनि देशमा क्षेत्रीय, जातीय, धार्मिक, साम्प्रदायिक स्वार्थ प्रेरित विभिन्न सशस्त्र तथा विखण्डनकारी समूहहरुले बिभिन्न मागहरु राखी गैह्र कानूनी गतिविधिलाई निरन्तरता दिंदै आएकोले प्रहरी परिचालनलाई अझै वैज्ञानिक र प्रभावकारी बनाई उल्लिखित गतिविधि नियन्त्रण गर्नको लागी कार्य योजना तयार गरी कार्य संचालन गरिरहेकोमा मिति २०७७।०७।२७ गते मन्त्री परिषद्को निर्णय अनुसार आतंकबाद नियन्त्रण महाशाखालाई शाखामा रुपान्तरण भई आएको हुँदा सोही बमोजिम कार्य सम्पादन गर्दै आईरहेको छ ।
उद्देश्य:
देशको आन्तरिक सुरक्षामा चुनौती सृजना गर्ने सशस्त्र, विखण्डनकारी तथा राजनीतिक दल, समूह, संघ संस्था र फरक विचार भएका व्यक्तिहरूको गतिविधि नियन्त्रण गर्न, सो सम्बन्धि सूचना संकलन, विश्लेषण र सम्प्रेषण गर्नु नै यस शाखाको मुख्य उद्देश्य हो ।
परिचय:
नेपाल राज्यभर रहेका कारागार तथा बाल सुधार गृहहरूको सुरक्षा संवेदनशीलतालाई मध्यनजर गर्दै, नेपाल प्रहरी प्रधान कार्यालय, कार्य विभाग अन्तर्गत कारागार समन्वय डेस्क मिति २०८१।०९।०७ मा स्थापना गरिएको हो । यस डेस्कको देशभरका कारागार तथा बाल सुधार गृहहरूमा रहेका थुनुवा, कैदीबन्दी, विवादमा परेका बालबालिका र बाल बिच्याईकर्ताहरूको अवस्था, सुरक्षाको अवस्था तथा अन्य गतिविधिहरूको समन्वय, अनुगमन र निगरानी गर्ने गर्छ ।
उद्देश्य:
देशभरका कारागार र बाल सुधार गृहहरूमा रहेका थुनुवा, कैदीबन्दी, विवादमा परेका बालबालिका तथा बाल बिच्याईकर्ताहरूको अवस्था, सुरक्षाको स्थिति तथा सम्बन्धित गतिविधिहरूको समन्वय, अनुगमन र निगरानी गर्नु यस डेस्कको प्रमुख उद्धेश्य रहेको छ ।