नेपाल प्रहरी प्रधान कार्यालय

संचार निर्देशनालय

परिचय

देशमा शान्ति सुरक्षा अमन चयन कायम राख्‍ने, अपराधको रोकथाम र नियन्त्रण गर्ने गहन जिम्मेवारीलाई कुशलतापूर्वक निर्वाहको लागि संचार आदान प्रदान तथा संचार प्रविधिको प्रयोग गरी नेपाल प्रहरीको काम कारवाही/कार्य सम्पादनलाई प्रभावकारी बनाउने हुँदा प्रहरी संचारको महत्वपूर्ण भूमिका रहेको छ । प्रहरी कार्यलाई गतिशिल, व्यवस्थित र प्रभावकारी बनाई कार्य सम्पादन गर्न गराउन प्रहरी संगठनमा आफ्नै संचार प्रणालीको आवश्यकता महशुस भई २०१५ सालमा आकाशवाणी शाखाको नामबाट सुरुवात भएको प्रहरी संचार सेवा विशिष्टिकरणको अवधारणा अनुरुप विभिन्‍न कालखण्डहरु पार गर्दै २०४४ सालमा संचार शाखा, २०५३।०९।१५ मा संचार महाशाखा र २०६७।०३।१५ मा संचार निर्देशनालयमा स्तरोन्‍नती भई हाल नेपाल प्रहरीमा १२१४ स्थानहरुमा संचार दरबन्दी कायम भएको र सबै प्रहरी इकाईहरुमा संचारको पहुँच रहेको छ । प्रहरी संचारले स्थापना काल देखि उपलव्ध सिमित श्रोत साधनहरुको अधिकतम परिचालन र संचालन गरी निरन्तर रुपमा संचार आदान प्रदान गर्दै आई रहेको छ । HF/VHF/UHF रेडियो प्रविधि, Digital Trunking रेडियो प्रविधि, CCTV Camera System, RPA/Drone प्रविधि, RCS (Rapid Communication System, 4G Two-way Radio System), टेलि-कम्प्युनिकेशन (CUG, आन्तरिक EPABX आदी) र बिभिन्‍न सुरक्षात्मक उपकरणहरु (Frequency Jammer, Walk Through Gate, Baggage X-ray Machine, Vehicle Bottom Scanner आदी) लगायतका सम्पूर्ण Electronics and Communication तर्फका संचार प्रविधिहरु समय सापेक्ष आधुनिकीकरण, सुदृढ र व्यवस्थित गरी प्रहरी कार्य एवं अपराध अनुसन्धान तर्फको सेवा प्रवाहलाई प्रभावकारी तथा परिणाममुखी बनाएको छ । यसलाई अझ बढी प्रभावकारी, समय-सापेक्ष र सुरक्षित बनाउन नयाँ प्रविधिहरुको प्रयोग तथा विस्तार तर्फ सदैव प्रयासरत रहँदै आएको छ।

उद्देश्य

संचार आदान-प्रदान तथा संचार नेटवर्क मजबुत बनाउनु, संचार उपकरणहरुको मर्मत संभार, संचार प्रविधि तथा विज्ञ प्राविधिकहरुको परिचालन, संचार तर्फका जनशक्तिलाई समय सापेक्ष तालिम प्रदान र अन्य संचार श्रोतसाधन एवं जनशक्तिको व्यवस्थापन गरी नेपाल प्रहरीको काम कारवाहीलाई संचार प्रविधिहरुको प्रयोगले छिटो छरितो, व्यवस्थित एवं प्रभावकारी ढंगबाट कार्य सम्पादन गर्नु गराउनु हो ।