नेपाल प्रहरी प्रधान कार्यालय

सुरक्षा सेवा व्यवस्थापन महाशाखा

परिचय:

स्वदेशी तथा विदेशी अति विशिष्ट र विशिष्ट व्यक्तिको सुरक्षा व्यवस्था मिलाउन, व्यक्तिगत सुरक्षा अधिकृत खटाउन, राष्ट्रिय तथा अन्तर्राष्ट्रिय स्तरको सम्मेलन, गोष्ठी, समारोहस्थलको विश्वसनीय एवं भरपर्दो सुरक्षा व्यवस्था मिलाउने उद्देश्यले सेवा बिशिष्टिकरणको अवधारणा अनुसार वि.सं.२०५४ सालमा प्र.प्र.का. अपराध अनुसन्धान विभाग सुरक्षा शाखा, सामान्य सुरक्षा उपशाखा र विशिष्ट व्यक्तिको सुरक्षा शाखाको ५३ जनाको दरवन्दी कायम गरी कार्य विभाग अन्तर्गत रहने गरी कार्य सम्पादन गर्दै आएकोमा मिति २०५८ सालमा प्र.व.उ. को कमाण्डमा रहने गरी सुरक्षा महाशाखा स्थापना गरिएको थियो । त्यस्तै गरि मिति २०६६ सालमा सुरक्षा महाशाखालाई स्तर बृद्धि गरी प्र.ना.म.नि.को कमाण्डमा रहने गरी सुरक्षा सेवा निर्देशनालय कायम भएको थियो भने २०७१ सालमा यस निर्देशनालय मातहत रहने गरी प्र.ना.उ.को कमाण्डमा प्रधानमन्त्री विशेष सुरक्षा ईकाइको स्थापना हुनुका साथै मिति २०७२ सालमा अंगरक्षक गण स्थापना गर्ने निर्णय भई २०८० असार त्रिपुरेश्वरमा नेपाल प्रहरी अंग रक्षक गणको स्थापना गरिएको र आ.व.२०८१।०८२ मा बजेट निकासा भई पूर्णरुपमा संचालनमा रहेको छ । त्यसै गरि मिति २०७८ सालमा यस कार्यालयको साविकको दरवन्दी संख्या र नाम परिवर्तन भई हाल नेपाल प्रहरी प्रधान कार्यालय सुरक्षा सेवा व्यवस्थापन महाशाखा अन्तर्गत नेपाल प्रहरी अंगरक्षक गण, नेपाल प्रहरी मर्यादापालक इकाई, नेपाल प्रहरी विशिष्ट व्यक्ति सवारी चालक इकाई र नेपाल प्रहरी प्रधानमन्त्री विशेष सुरक्षा इकाई रही सुरक्षा सेवा प्रदान गर्दै आईरहेको छ ।

 उद्देश्य: 

 स्वदेशी तथा विदेशी अति विशिष्ट तथा विशिष्ट व्यक्तिहरुको कार्यक्रम सम्वन्धमा समन्वयात्मक सुरक्षा सम्वन्धी वैठकमा भाग लिई सुरक्षा सेवामा आवश्यक श्रोत साधनको व्यवस्थापन र परिचालन गरी स्वदेशी तथा विदेशी विशिष्ट तथा अति विशिष्ट व्यक्तिहरुको भरपर्दो सुरक्षा व्यवस्था मिलाउने, सुरक्षा प्रबन्ध सम्बन्धमा मातहत तथा अन्य निकायहरुसँग सूचना प्रवाह र समन्वय गर्ने, प्रहरी कर्मचारीहरुलाई व्यवसायिक रूपले चुस्त तुल्याउन तालिम, अनुशिक्षण र पुनर्ताजगी तालिमको व्यवस्था गर्ने र “अति विशिष्ट तथा विशिष्ट व्यक्तिहरुको सुरक्षा व्यवस्थापन कार्यविधि २०८१ ” अनुसार सुरक्षा प्रदान गरी विशिष्ट व्यक्तिहरुको सुरक्षा व्यवस्थालाई अझ बढि प्रभावकारी, व्यवस्थित र परिणाम मुखी बनाउने उद्देश्य रहेको छ ।